D'alhors, quau sèm ?

Tout à fait Thierry, una question existenciala sobre importanta.

PASCALNET, quo-es una associacion lei 1901 que ven promoure los rets sociaus liures e federats en Auvèrnha. Quo-es de dire los mejans de comunicar e de partatjar per internet sens besoenh de despendre d'una entrepresa privada coma Facebook o Google, que collectan de las donadas personalas, que manipulan de le contengut de lhurs rets e que nos laissan despendre de lhuras chausidas. Propausèm dònc daus rets alternatius (messatjaria instantanada, mèl, blogatge, partatge de contengut...) liures e federats. z-Avèm maitot un engatjament fòrt dins la preservacion de las lingas regionalas, (mai que mai dònc l'occitan auvernhat, per ce qu'es la linga de nòstre territòri). Essatgèm dònc de contribuar a las reviradas daus logiciaus qu'utilizèm en occitan, per favorisar son bon veire e son utilizacion per internet.

E dau còp, de qu'aquo-es un ret sociau liure e federat ?

Liure: Utilizèm mas daus logiciaus liures, coma quo, los logiciaus darrèir le fonccionar de chasque ret z-o es. Quo vòu dire que lhur còdi fònt z-es disponible au veire de trestots (possibilitat de saubre coma foncciona exactament), que lhur desvolopament z-es collaboratiu, e qu'es possible de z-os copiar e de z-os tornar distribuar. Per ne'n saubre mai, veire las 4 libertats fondamentalas daus logiciaus liures.



Federat: Nòstres rets sociaus son federats. Son connectats embei una federacion mai granda constituada d'autres eberjadors (associatius o non), qu'utilizan los mèsmes protocòls. Coma quo, en utilizant un ret de PASCALNET, vos podètz comunicar embei tota los utilizaires de la federacion tota. Vos es mèsma aisat chamjar d'eberjador, si PASCALNET vos agrada pus, tot en gardant le mèsme ret ! D'aquel biais, degun z-a le contraròtle sobre los rets qu'utilizèm. Per mai d'informacions, espiar aquel article.

L'assó

Nòstra assó z-es constituada per sos aderents, que noman un Conselh d'Administracion, conselh que compòrta dos regentaires, los responsables legaus de l'assó. Le CA ten l'accès "root" (accès administador principau) daus servidors de PASCALNET. Una adesion vau a l'ora d'avora 5€ per los non-benvolents e pretz liure per los benvolents. Una amassada generala ordinari ente son renduts los comptes e presas las decisions importantas (nomatge dau CA) se ten tota los fiurèirs. Los aderents siràn sonats regularament per decidar dau servici que ven que sirà mes en plaça.

Per ne'n saubre mai sobre l'assó en generau, vos fau pas esitar de navejar a travèrs las pajas dau site e dau wiki !